ചോദ്യം: സ്ത്രീയുടെ ഔറത്ത് മുഖവും മുന്കയ്യും ഒഴിച്ച് ബാക്കിയുള്ള ശരീരത്തിന്റെ മുഴുവന് ഭാഗവുമാകുന്നുവെന്ന് പറയുന്നത് നിസ്കാരത്തില് മാത്രമാണോ? അതല്ല നിരുപാധികമാണോ?
ഉത്തരം: നിരുപാധികമല്ല. ഇമാം സിയാദി(റ) ശറഹുല് മുഹര്ററില് പറയുന്നു. സ്ത്രീക്ക് മൂന്ന് ഔറത്തുകളാണുള്ളത്. ഒന്ന്, നിസ്കാരത്തിലെ ഔറത്ത്. അത് മുമ്പു പറഞ്ഞതു തന്നെ. രണ്ട്, അന്യപുരുഷന്മാരെ സംബന്ധിച്ചുള്ള ഔറത്ത്. അത് പ്രബലമായ അഭിപ്രായപ്രകാരം മുഖവും മുന്കയ്യും ഉള്പ്പെടെയുള്ള ശരീരത്തിന്റെ പൂര്ണ ഭാഗമാകുന്നു. മൂന്ന്, തനിച്ചോ മഹാരിമു(വൈവാഹിക ബന്ധം നിഷിദ്ധമായവര്)കളുടെ കൂടെ ആകുമ്പോഴോ ഉള്ള ഔറത്ത്. അത് പുരുഷന്റെ ഔറത്ത് പോലെയാകുന്നു (മുട്ടുപൊക്കിളിനിടയിലുള്ള സ്ഥലം). ഇത് ഉദ്ധരിച്ചശേഷം ഇമാം കുര്ദി(റ) നാലാമത്തൊരു ഔറത്ത് കൂടി കൂട്ടിച്ചേര്ക്കുന്നു. അത് അമുസ്ലിം സ്ത്രീയെ അപേക്ഷിച്ചിട്ടുള്ള ഔറത്താണ്. ജോലി സമയത്ത് സാധാരണഗതിയില് വെളിവാകുന്ന ഭാഗമാണത്. പക്ഷേ, ഇപ്പറഞ്ഞത് ആ അമുസ്ലിം സ്ത്രീ ഇവളുടെ സയ്യിദത്തോ മഹാരിമില് (വൈവാഹിക ബന്ധം നിഷിദ്ധമായവര്) പെട്ടവളോ ആകാതിരിക്കുമ്പോഴാണ്” (ശര്വാനി 2/112).
അന്യപുരുഷന്മാരെ അപേക്ഷിച്ച് ശരീരമാസകലം ഔറത്താണെന്ന് സിയാദി(റ) പ്രബലമാക്കിയത് ഇബ്നുഹജര്(റ) പ്രബലമാക്കിയതിനെതിരാണ്. അന്യപുരുഷന്മാരെ അപേക്ഷിച്ചും മുഖവും മുന്കയ്യും ഔറത്തെല്ലന്നാണ് ഇബ്നുഹജര്(റ) പറയുന്നത്. പക്ഷേ, വെളിവാക്കുന്നത് കൊണ്ട് നാശം ഭയപ്പെടുമ്പോള് മറക്കല് നിര്ബന്ധവും വെളിവാക്കല് കുറ്റകരവുമാകുന്നു (തുഹ്ഫ 7/192, ഫതാവ 1/199).
RELATED ARTICLE