ചോദ്യം:
ചില സുന്നിപള്ളികളില്തന്നെ ജുമുഅ ഖുത്വുബ പരിഭാഷപ്പെടുത്തുന്നു. അതിനു തെളിവായി ചിലര് യുശ്തറത്വു കൌനുഹാ അയ് അല് അര്കാനി ദൂന മാ അദാഹാ അറബിയ്യതന് എന്ന വാക്ക് തെളിവായി ഉദ്ധരിക്കുന്നു. ഇതിന്റെ സത്യാവസ്ഥ വ്യക്തമാക്കിയാലും
ഉത്തരം:
തുഹ്ഫ മിന്ഹാജിന്റെ വ്യാഖ്യാനമാണ്. ‘വയുശ്തറത്വു കൌനുഹാ അറബിയ്യതന്’ എന്നേ മിന്ഹാജിലുള്ളൂ. ഇമാം മഹല്ലി(റ) ഇതിനെ വ്യാഖ്യാനിക്കുന്നത് ഇങ്ങനെയാണ്. ‘ഖുത്വുബ പൂര്ണമായും അറബിയിലായിരിക്കല് ശര്ത്വാകുന്നു’ (മഹല്ലി 1/278).
ഇമാം റാഫിഈ(റ) ശറഹുല് കബീര് 4/579ല് പറയുന്നു. ‘ഖുത്വുബ പൂര്ണമായും അറബിയിലായിരിക്കല് നിബന്ധനയാകുന്നു.’
ഇതില് നിന്ന് ഖുത്വുബ സാധുവാകണമെങ്കില് അനുബന്ധങ്ങളും അറബിയിലായിരിക്കല് നിബന്ധനയാണെന്ന് തോന്നാന് അവകാശമുണ്ട്. യഥാര്ഥത്തില് ഖുത്വുബയിലെ അവിഭാജ്യഘടകങ്ങള്ക്കിടയില് സമയം ദീര്ഘമാകാതെ അനുബന്ധങ്ങള് അനറബിയിലാകല് കൊണ്ട് ഖുത്വുബ അസാധുവാകുന്നില്ല. (ഹാശിയതുന്നിഹായ 2/317 നോക്കുക).
ഇനി അനുബന്ധങ്ങള് പാടേ ഉപേക്ഷിച്ചാലും ഖുത്വുബ സാധുവാകുന്നതാണ്. ഉപര്യുക്ത ആ തോന്നല് (അനുബന്ധങ്ങള് അറബിയിലാകല് നിബന്ധനയാണെന്നത്) റദ്ദുചെയ്യാന് വേണ്ടിയാണ് തുഹ്ഫയിലും മറ്റും അയ് അല് അര്കാനി ദൂനമാ അദാഹാ (അതായത് അവിഭാജ്യഘടകങ്ങള് അറബിയിലാകല് നിബന്ധനയാണെന്നുദ്ദേശ്യം. എന്നല്ലാതെ അനുബന്ധങ്ങളും അറബിയിലാകല് നിബന്ധനയാണെന്നല്ല) എന്നുപറഞ്ഞത്.
അപ്പോള് ഇമാം റാഫിഈ(റ)യും ഇമാം മഹല്ലി(റ)യും ഖുത്വുബ പൂര്ണമായും അറബിയിലാകല് നിബന്ധനയാണെന്ന് പറഞ്ഞതിന്റെ താത്പര്യം ഖുത്വുബയുടെ അവിഭാജ്യ ഘടകങ്ങള് അറബിയിലായിരിക്കല് ഖുത്വുബയുടെ സാധുതക്ക് നിബന്ധനയായത് പോലെ അനുബന്ധങ്ങള് അറബിയിലായിരിക്കല് അവകളെ ഖുത്വുബയുടെ അനുബന്ധങ്ങളായി പരിഗണിക്കാനുള്ള നിബന്ധനയാണെന്നാണ്. അല്ലാതെ ഖുത്വുബ സാധുവാകാന് അനുബന്ധങ്ങള് അറബിയിലായിരിക്കണമെന്നോ അനുബന്ധങ്ങള് തന്നെ വേണമെന്നോ അല്ല. എങ്കിലും അനുബന്ധങ്ങള് അനറബിയില് കൊണ്ടുവരല് ഹറാമാണ്. കാരണം ശര്ത്വില്ലാതെ ഏത് ആരാധനയും അനുഷ്ഠിക്കല് ഹറാമാണ് (ഇഹ്കാമുല് അഹ്കാം 2/10).
ഉദാഹരണമായി വുളൂഇന്റെ അവിഭാജ്യഘടകങ്ങളില് പെട്ടതല്ല മുന്കൈ കഴുകല്. സു ന്നത്ത് മാത്രമാണ്. എങ്കിലും ആ സുന്നത്ത് സുന്നത്തായി പരിഗണിക്കണമെങ്കില് അതിനുപയോഗിക്കുന്ന വെള്ളം ത്വഹൂറാകണമെന്ന നിബന്ധനയുണ്ട്. പ്രത്യുത മറ്റു വെള്ളങ്ങള് കൊണ്ട് വുളൂഅ് എടുക്കുന്നു എന്ന ഉദ്ദേശ്യത്തോടെ മുന്കൈ കഴുകുന്നത് വുളൂഇന്റെ സാധുതയെ ബാധിക്കുന്നിെല്ലങ്കിലും ആ പ്രവൃത്തി കുറ്റകരമാണ്. അപ്പോള് വുളൂഅ് എടുക്കുന്ന പക്ഷം ത്വഹൂറാകല് നിബന്ധനയാണെന്ന് പറയുന്നത് കൊണ്ട് വിവക്ഷ വുളൂഇന്റെ അര്കാനുകള് മാത്രമാണ്. മറ്റുള്ളവയല്ല എന്നുപറഞ്ഞാല് മറ്റുള്ള സുന്നത്തുകള് പാടേ ഉപേക്ഷിക്കുന്നതുപോലെ തന്നെ അവ ത്വഹൂറല്ലാത്ത വെള്ളം ഉപയോഗിച്ച് ചെയ്താലും വുളൂഇന്റെ സാധുതയെ ബാധിക്കുന്നില്ലെന്നാണ് ഉദ്ദേശ്യം. എങ്കിലും ആ സുന്നത്തുകള് പരിഗണിക്കപ്പെടാന് െവള്ളം ത്വഹൂറാകല് നിബന്ധനയായതുകൊണ്ട് മറ്റു വെള്ളങ്ങളുപയോഗിച്ച് ആ സുന്നത്തുകള് നിര്വഹിക്കുന്നത് കുറ്റകരമാണെന്നതില് പക്ഷാന്തരമില്ല.
ഇപ്രകാരം തന്നെയാണ് ഹനഫീ വീക്ഷണവും. അബ്ദുല് ഹയ്യില് അന്സ്വാരി(റ) പറയുന്നു: ‘അനറബി ഭാഷയില് ഖുത്വുബ നിര്വഹിക്കലും അറബിയില് നിര്വഹിച്ച് അനറബിയില് പരിഭാഷപ്പെടുത്തലും നബി(സ്വ)യോ സ്വഹാബത്തോ ത്വാബിഉകളോ മുതല് കാലമിതുവരെയും നടന്നിട്ടില്ല. അത് പരിഭാഷ ചെയ്യുന്നതില് ഹറാമിന്റെ കുറ്റമാണുള്ളതെന്നതില് സംശയമില്ല’ (ഉംദതുര്രിആയ 1/200 നോക്കുക).
ശാഹ് വലിയ്യുല്ലാഹിദ്ദഹ്ലവി(റ) പറയുന്നു: ‘ലോക മുസ്ലിംകളില് ബഹുഭൂരിഭാഗവും അനറബികളായിരിക്കേ ഖുത്വുബ അറിയില് തന്നെയാകണമെന്നത് അവരുടെ നിരന്തര അനുഷ്ഠാനം അറബിയില് തന്നെയാണെന്ന അടിസ്ഥാനത്തിലാണ്’ (അല് മുസ്വഫ്ഫ 1/154).
അപ്പോള് അത് ഇജ്മാഇന്റെ സ്ഥാനത്താണ്. ഇജ്മാഇന് എതിര് പ്രവര്ത്തിക്കുന്നത് ഹറാമാണ് (ജംഉല് ജവാമിഅ്, അത്വാര് സഹിതം 2/233 നോക്കുക). സദസ്യര്ക്കറിയാത്ത ഭാഷയില് ഖുത്വുബ നിര്വഹിച്ചിട്ടെന്താണ് ഫലം? എന്ന ചോദ്യത്തിനുത്തരമായി ഖാളി ഹുസൈന്(റ) പറഞ്ഞത് അത് മൊത്തത്തില് ഒരു ഉപദേശമാണെന്നറിഞ്ഞാല് മതി എന്നാണ് (മഹല്ലി 1/279 നോക്കുക).
RELATED ARTICLE