ചോദ്യം: ഭര്ത്താവ് ഇമാമായി നിന്ന് ഭാര്യയും ഭര്ത്താവുമൊന്നിച്ച് നിസ്കരിക്കുന്നത് ശരിയാണോ? സ്ത്രീകള്ക്ക് പെരുന്നാള് ദിവസം പള്ളിയിലോ മൈതാനത്തോ പോയി നിസ്കരിക്കാമോ?
ഉത്തരം: ഭര്ത്താവ് ഇമാമായിക്കൊണ്ട് ഭാര്യാഭര്ത്താക്കന്മാര് ജമാഅത്തായി നിസ്കരിക്കാമെന്ന് മാത്രമല്ല, അതിന് ജമാഅത്തിന്റെ ശ്രേഷ്ഠത ലഭിക്കുന്നതും അതുകൊണ്ടുതന്നെ തനിച്ച് നിസ്കരിക്കുന്നതിനെക്കാള് ഇരുപത്തിയേഴ് ഇരട്ടി പുണ്യമുള്ളതുമാകുന്നു. (നിഹായ 2/140)
(പെരുന്നാള് ദിവസമായാലും അല്ലെങ്കിലും പള്ളിയിലേക്കായാലും അല്ലെങ്കിലും) പരപുരുഷന്മാര് പങ്കെടുക്കുന്ന ജമാഅത്തുകള്ക്ക് സ്ത്രീ പങ്കെടുക്കുന്നതുകൊണ്ട് നാശം ഭയപ്പെടുമ്പോള് ആ ജമാഅത്തുകള്ക്ക് വേണ്ടി അവര് പുറപ്പെടുന്നതും അതിനവര്ക്ക് സമ്മതം നല്കുന്നതും ഹറാമാണെന്ന് തുഹ്ഫ 2/252, 253 ല് വ്യക്തമാക്കിയിട്ടുണ്ട്.
എന്നാല് ഇന്നവര് പുറപ്പെടുന്നതുകൊണ്ട് നാശം വ്യാപകമായതിനാല് പുറപ്പെടുന്നത് ഹറാം തന്നെയാണെന്ന് ഉറപ്പിച്ചുപറയേണ്ടിയിരിക്കുന്നുവെന്നും ഇതുതന്നെയായിരുന്നു ഏറ്റവും ഉത്തമ നൂറ്റാണ്ടില് തന്നെ ഉമ്മുല് മുഅ്മിനീന് ആഇശ(റ) ഫത്വ നല്കിയതെന്നും അപ്പോള് പിന്നെ നാശമേറിയ നമ്മുടെ കാലത്തെ സംബന്ധിച്ച് പറയേണ്ടതില്ലെന്നും ഇമാം തഖ്യ്യുദ്ദീനി ദ്ദിമശ്ഖി(റ) തന്റെ കിഫായതുല് അഖ്യാര് 1/95ല് വ്യക്തമാക്കിയിട്ടുണ്ട്.
നാശം വ്യാപകമാകാന് തുടങ്ങിയപ്പോള് ഖുലഫാഉര്റാശിദുകളുടെ കാലഘട്ടത്തില് തന്നെ അവര് പുറപ്പെടുന്നത് പൂര്ണമായും വിലക്കപ്പെട്ടിട്ടുണ്ടെന്ന് ഇമാം അബൂമുഹമ്മദില് ഉന്ദുലിസി(റ) തന്റെ ബഹ്ജതുന്നുഫൂസ് 2/5ല് വിശദീകരിച്ചിട്ടുണ്ട്.
ഇതുതന്നെയാണ് നമ്മുടെ മദ്ഹബിന്റെ സംക്ഷിപ്തമെന്നും ഇതനുസരിച്ചാണ് ഫത്വ നല്കേണ്ടതെന്നും ഇബ്നുഹജര്(റ) തന്റെ അല്ഫതാവല് കുബ്റ 1/204ല് രേഖപ്പെടുത്തിയിരിക്കുന്നു.
RELATED ARTICLE